Нов контроверзен закон стапи на сила во Русија со кој од странците се бараат здравствени контроли на секои три месеци, вклучително и за сексуално преносливи болести.
Од 29 декември, речиси сите странци во земјата мора да поминат медицински прегледи за ХИВ, сифилис, гонореја, туберкулоза и Ковид-19, како и за други болести.
Ќе им се тестира и крвта за присуство на нелегални дроги, а мора да достават отпечатоци од прсти и други биометриски податоци. Некои ќе бидат подложени на рендген и КТ скенови.
На оние кои ќе одбијат да се придржуваат до законот може да им бидат одземени работните дозволи, додека белоруските граѓани, децата на возраст под шест години и дипломатите се меѓу оние кои се ослободени од новите барања.
Странската бизнис заедница предупреди дека новите мерки би можеле да поттикнат егзодус на менаџери и други бизнис претставници.
Во средината на декември, претседателскиот портпарол Дмитриј Песков ја смируваше таквата загриженост и понуди гаранции дека претседателот Владимир Путин „се залага за создавање најудобни услови за странските бизниси, за инвеститорите и странските специјалисти“.
Министерството за здравство, исто така, сугерираше дека здравствените проверки всушност нема да мора да се прават на секои три месеци и покрај формулацијата во законите.
Критичарите предупредуваат дека новите мерки ќе и овозможат на руската влада да го прошири своето собирање податоци за странци и дека тоа може негативно да влијае на стотиците илјади работници мигранти во земјата.