Од Талат Џафери до вселената

МАКЕДОНИЈА - Од Основното јавно oбвинителство на Република Северна Македонија денеска информираа дека нивните службеници од тетовското обвинителство се уште работат на предметот отворен поради пожарот во модуларната болница на 8 септември во Тетово, при што животите ги загубија 14 луѓе.

ПОЛСКА - Полска и соседна Литванија соопштија дека ги зајакнуваат мерките за безбедност на границите со Белорусија, откако Варшава соопшти дека илјадници мигранти се собираат во близина на границата, а видеата на социјалните мрежи покажуваат стотици како одат кон полската граница.

ГРУЗИЈА - Поранешниот претседател на Грузија и опозициски лидер Михаил Саакашвили, кој е во затвор и штрајкува со глад од почетокот на октомври, денеска е префрлен во затворската болница, соопшти затворската служба.

САД - Белата куќа соопшти дека верува оти американските судови на крајот ќе го поддржат указот на претседателот Џо Бајден за задолжителна вакцинација во компаниите со повеќе од 100 вработени. Инаку оваа одлука веќе ја стопираше конзервативниот федерален апелационен суд.

ЧЕШКА - Чешките партии потпишаа договор за поделба на власта за формирање коалициска влада по парламентарните избори во земјата минатиот месец, ветувајќи дека ќе ја усогласат надворешната политика со ЕУ и НАТО, и дека ќе ги „преиспита“ односите со Русија и со Кина.

МАКЕДОНИЈА - До Собранието на Република Северна Македонија е доставено барањето за гласање за доверба на Владата на Република Северна Македонија и истото е архивирано од надлежните служби, соопштија попладнево од Кабинетот на претседателот на Собранието, Талат Џафери. Седница за гласање на доверба е закажана за в четврток.

МАКЕДОНИЈА - Шефот на дипломатијата Бујар Османи донел одлука да се прекине договорот со професорот Ванчо Ѓоргиев, кој беше член на Македонско-бугарската комисија за историски и образовни прашања, а кој пред две недели најави оставка од Комисијата, поради, како што напиша, директни мешања на висок функционер од МНР во работата на Комисијата.

КИНА - Космонаутката Ванг Јапинг денеска стана првата Кинезинка која изведе вселенска прошетка, а чија цел е да се продолжи изградбата на кинеска вселенска станица.

САД - Американски државјанин кој учествуваше во насилниот упад во Капитолот во Вашингтон на 6 јануари годинава, бара политички азил во Белорусија.