Повеќе од 100 лидери во светот кои учествуваат на климатската конференција на ОН во Глазгов, Шкотска, се очекува денеска да потпишат ветување за запирање и враќање на уништувањето на шумите до 2030 година. Заедничката изјава ќе биде потпишана на климатските разговори COP26 од страна на лидерите на земјите кои заедно сочинуваат 85 отсто од светските шуми, се вели во соопштението од кабинетот на британскиот премиер Борис Џонсон. Меѓу тие земји се Бразил, Индонезија и Демократска Република Конго, кои имаат некои од најголемите и најзагрозени шуми во светот. Заложбата ќе биде поддржана со ветување за обезбедување на 12 милијарди долари јавни финансии од 12 земји до 2025 година.
Бајден - Kлиматските промени веќе го уништуваат светот
На вчерашното отворање на конференцијата премиерот Џонсон рече: „Гневот и нетрпеливоста на светот ќе бидат незадржливи доколку не го направиме овој состанок во Глазгов во моментот кога ќе станеме реални за климатските промени, Има една минута до полноќ, и ние треба да дејствуваме сега“. До Конференцијата доаѓа откако големите индустриски земји на Групата 20 (Г20) не успеаја да договорат амбициозни нови обврски на самитот викендов во Рим. Г-20 е одговорен за околу 80 отсто од емисиите на јаглерод диоксид, гасот произведен од согорувањето на фосилните горива за кој се верува дека е главната причина за топлотните бранови, сушите, поплавите и бурите што се зголемуваат во интензитет ширум светот.
Климатски промени една од главните теми на состанокот Г20 во Рим
Повеќе од 120 лидери се во Глазгов на дводневни говори кои ќе бидат проследени со технички преговори. Тие треба да се согласат за општите контури на новиот договор за климата, а потоа ќе ги остават другите владини претставници да ги изнесат клучните детали пред затворањето на конференцијата на 12 ноември. На самитот отсуствуваат кинескиот претседател Си Џинпинг, чија земја е убедливо најголем загадувач со стакленички гасови и претседателот Владимир Путин од Русија, земја број 4 во светот која емитува јаглероден гас. Американскиот претседател Џо Бајден на конференцијата изјави дека ја објавува долгорочната стратегија за климата на САД, чија цел е да се постигнат нето нула емисии на стаклена градина до 2050 година. Тој, исто така, рече дека активностите преземени оваа деценија за спречување на климатските промени ќе бидат одлучувачки за да се спречи идните генерации да страдаат, изјавувајќи дека „никој од нас не може да го избегне најлошото што допрва доаѓа ако не успееме да го искористиме овој момент“.