Од папата до Фејсбук

САД - Фејсбук го смени името на компанијата во Мета, бидејќи се обидува да го прошири својот идентитет надвор од платформата за социјалните медиуми. Основачот и главен извршен директор Марк Закерберг го објави ова за време на годишната конференција за виртуелна и проширена реалност на компанијата.

ИТАЛИЈА - Светската здравствена организација (СЗО) и другите хуманитарни групи денеска ги повикаа лидерите на 20-те најголеми светски економии да финансираат план од 23,4 милијарди долари за испорака на вакцини, тестови и лекови за коронавирус во сиромашните земји во следните 12 месеци. На ден пред средбата на Г-20 во Рим, неколку граѓански здруженија и активистички групи протестираа низ италијанската метропола.

МАКЕДОНИЈА - Јавниот долг заклучно со третиот квартал падна под 60 отсто од бруто домашниот производ, колку што е определено со мастришкиот критериум на Европската унија, позиционирајќи се на ниво од 59,3 проценти од БДП, соопшти Министерството за финансии, додавајќи дека ова ја покажува добро поставената фискална политика и доброто управување со јавните финансии и во време на пандемијата со Ковид-19.

ГРЦИЈА - Во морето источно од островот Крит во тек е акција на грчката крајбрежна служба за спасување на товарен брод во кој се превезуваат околу 400 лица, најверојатно бегалци и мигранти.

МЈАНМАР - Судот во Мјанмар денеска донесе осудителна пресуда со казна затвор од 20 години поради предавство за близок соработник на претходно соборената цивилна лидерка Аунг Сан Су Чи. Станува збор за поранешниот член на парламентот и претседател на партијата на Су Чи Националната лига за демократија, Вин Хтејн.

БУГАРИЈА / МАКЕДОНИЈА - Со Северна Македонија имаме заедничко минато и заедничка иднина, изјави привремениот бугарски премиер Стефан Јанев во дискусија на Фејсбук, при тоа апелирајќи земјава да ги признае правата на оние граѓани кои себе си се идентификуваат како Бугари.

СУДАН - Новиот воен владетел во Судан, генералот Абдел Фатах ал-Бурхан, најави дека ќе назначи нов шеф на владата во текот на следната недела. Тој во интервју за руската новинска агенција Риа истакна дека наскоро ќе биде номиниран технички премиер, а, како што вели, списокот со кандидати сè уште не е подготвен. Фатах ал - Бурхан посочи дека по именувањето на новиот технички премиер ќе биде составен и владиниот кабинет.

ВАТИКАН / САД - Пандемијата со ковид- 19, климатските промени и глобалната сиромаштија беа темите за кои денеска невообичаено долго дискутираа американскиот претседател Џо Бајден и папата Франциско, како дел од посетата на Бајден на Ватикан. Ватикан соопшти дека приватната средба траела еден час и 15 минути, а потоа биле доделени уште околу 15 минути за фотографирање и размена на подароци.

МАКЕДОНИЈА - Министерството за здравство соопшти дека во текот на вчерашниот ден, граѓаните кои имаат генерирано ЕУ-сертификат за вакцинација преку vakcinacija.mk, треба да генерираат нов преку веб порталот. Станува збор за безбедносен протокол со што ќе се спречи користење на лажни ЕУ-сертификати, со лажни имиња и лажни податоци.

УКРАИНА - Украина регистрира уште еден дневен рекорд на инфекции со коронавирус, додека бранот на новозаразени и смртни случаи продолжува да ја зафаќа Источна Европа.