Стабилни, загрижени, следени...

МАКЕДОНИЈА - Мнозинството е стабилно, нема да има нови избори и потреси, вели министерот за надворешни работи и портпарол на ДУИ, Бујар Османи. Тој вели дека во последниве 10 години секоја година има избори и дека нема потреба од нови.

МАКЕДОНИЈА - Актуелниот градоначалник на Куманово, кој е кандидат и на овие избори Максим Димитриевски се пожали дека го следело возило на МВР, а потоа полицијата го запрела и му ги зела документите. Во соопштението од изборниот штаб на Димитриевски се наведува дека полицијата со ротација го одвела градоначалникот на технички преглед, иако, како што тврди тој, возилото е ново и тој има уредно полномошно за управување на возилото.

МАКЕДОНИЈА - Група од 27 граѓани на Авганистан кои привремено престојуваа во Македонија, изутрината од Меѓународниот аеродром Скопје, со членови на нивните семејства заминаа за Даблин како нивно трајно одредиште.

ЕУ / ПОЛСКА - Европската комисија (ЕК) ќе делува да ја спречи Полска да ги поткопа европските вредности и кохезијата, откако полскиот Врховен суд ја отфрли превласта на законите на ЕУ над националните, изјави денеска претседателката на ЕК, Урсула фон дер Лајен.

БУГАРИЈА - Здравствените власти во Бугарија соопштија дека се регистрирани 4.979 новозаразени со ковид-19, во последните 24 часа, што е највисока дневна бројка забележана од март.

САД / КИНА - Соединетите држави се многу загрижени за она што Кина го прави во врска со хиперсоничните ракети, изјави во Женева постојаниот претставник на САД задолжен за разоружување, Роберт Вуд кој следната недела се враќа во Вашингтон.

КОСОВО - Прелиминарните резултати на општинските избори во Косово покажуваат дека 17 општини ги избрале победниците во трките за градоначалници, додека во 21 ќе има втор круг на гласање, вклучувајќи ја и Приштина.

СЕВЕРНА КОРЕЈА - Северна Кореја истрела неидентификувана ракета во морето, соопшти изутрината јужнокорејската армија. Проектилот бил истрелан во морето источно од полуостровот, соопшти армијата на Јужна Кореја, без да даде детални информации. Северна Кореја неодамна спроведе неколку тестови, вклучително и тест на ракета со голем дострел, како и тест на проектил за кој Пјонгјанг наведе дека бил хиперсоничен.