Со зурли и тапани се прославува пред седиштето на опозициската партија ВМРО-ДПМНЕ. Членови и симпатизери на партијата извикуваат „Цело Скопје вмровски град“, а заиграа и оро. Според партиски извори тие освоиле победа уште во прв круг во Јегуновце, Градско, Сопиште, Могила, Прилеп, Виница, Кратово, Илинден..., а водат во речиси сите скопски општини.
Лидерот на партијата, Христијан Мицкоски на својот Фејсбук профил напиша:
„Народот е определен. Надежта e родена. За секој човек во Македонија. Заеднички за новата иднина. Победа и голема одговорност! Ви благодарам народе на Македонија!“, напиша Мицкоски.
Организацискиот секретар на ДУИ, Артан Груби вели дека неговата партија победила во првиот круг во Арачиново, Боговиње, Теарце, Липково и Желино. Претходно портпаролот на ДУИ, Бујар Османи рече дека победиле во првиот круг во Сарај, Липково и Пласница.
Алијансата за Албанците слави победа во Гостивар. Актуелниот градоначалник Арбен Таравари прогласи победа уште во првиот круг. Тој на прес-конференција рече дека освоил 55 отсто од гласовите.
Генералниот секретар на СДСМ, Љупчо Николовски на првата прес-конференција по завршувањето на гласањето рече дека првичните трендови најавуваат уште една сигурна победа на СДСМ и Коалицијата. Заменик претседателот на СДСМ Фатмир Битиќи на дебатата на ТВ Телма рече дека според првичните информации, досега имаме добиено четири општини во првиот круг -Дојран, Крива Паланка, Лозово и Валандово.
„СДСМ има значителна предност во скопските општини Центар и Карпош, а води и во Бутел“, рече Битиќи.