Од Јотова до Клинтон

МАКЕДОНИЈА - Утрово околу 6:30 часот на излезот од индустриската зона Жабени се превртел автобус кој превезувал работници во фабриката Кромберг и Шуберт - Битола. Пет лица биле полесно повредени. Тие се амбулантски третирани и не се хоспитализирани.

БУГАРИЈА / МАКЕДОНИЈА - Прашањето за членство на Република Северна Македонија во ЕУ не е само бугарско, само балканско, туку е и паневропско, бидејќи се работи за политичко проширување на Унијата, тема што долго време беше на европската маса и која, за жал, не го најде својот консензус, вели потпретседателката на Бугарија, Илијана Јотова.

МАКЕДОНИЈА - Во буџетот на Општина Центар вратени се 6.169.500 денари, односно околу 100.000 евра, со активирање на банкарската гаранција за изградбата на таканаречените Шпански скали. Како што информираат од општината, до Амадеус Амадеус Девелопмент ДООЕЛ Скопје е доставена изјава за едностраното раскинување на договорот.

АЗЕРБЕЈЏАН - Азербејџанските сили раниле шестмина ерменски војници во енклавата Нагорно-Карабах околу која се водеше војна меѓу двете земји минатата година.

ТУРКМЕНИСТАН - Туркменистан, чиј авторитарен лидер тврди дека во земјата не е регистриран ниеден случај на ковид-19, тајно регистрирал околу 25 илјади смртни случаи поврзани со болеста од почетокот на пандемијата пред две години, изјави извор од туркменистанскиот здравствен систем за Радио Слободна Европа.

МАКЕДОНИЈА - Ефикасноста на вакцините против ковид-19 ја потврдуваат многу анализи. Вакцините штитат од тешка форма на болеста, од хоспитализации и смртен исход. Анализите на Министерството за здравство утврдија дека меѓу 79 отсто и 81 отсто од хоспитализираните пациенти со ковид-19 се невакцинирани, објави на својот фејсбук профил министерот за здравство Венко Филипче.

КЕНИЈА - Кениската полиција го уапси сопругот на светската атлетска рекордерка Агнес Тироп, откако таа беше пронајдена мртва во својата куќа.

ВАТИКАН / САД - Американскиот претседател Џо Бајден ќе се сретне со папата Франциско кога ќе го посети Ватикан подоцна овој месец, како дел од петдневното патување во Италија и Британија на средби за глобалната економија и климатските промени. На средбата со Папата закажана за 29 октомври, Бајден ќе разговара за пандемијата на коронавирусот, климатската криза и сиромаштијата, објави Белата куќа.

САД - Поранешниот американски претседател Бил Клинтон е примен во болница во Калифорнија поради инфекција што не е поврзана со ковид-19 и закрепнува, објави синоќа неговиот портпарол. 75 годишниот Клинтон беше примен во болница во вторникот вечерта. Тој останува во болница за постојано следење, соопштија лекарите, наведувајќи дека по дводневниот третман, добро реагирал на антибиотици.

ПОЛСКА / БЕЛОРУСИЈА - Полскиот парламент итно гласаше за законот предложен од владата на премиерот Матеуш Моравиецки за изградба на масивен ѕид поради мигрантската криза на граница со Белорусија што ќе ги чини полските даночни обврзници 351 милиони.

КОСОВО - Унгарскиот бригаден генерал Ференц Кајари денеска ќе ја преземе командата на меѓународната воена мисија на Косово во Приштина, што ќе биде првпат по повеќе од две децении, земја во регионот да ја преземе таа функција во КФОР. Кајари ќе го замени својот италијански колега Франко Федеричи, чиј мандат истекува. Унгарскиот генерал ќе биде 26-ти по ред командант на КФОР.