Побарувачката за нафта на светската берза може да порасне и за половина милион барели дневно поради глобалната енергетска криза.Тоа ја поттикнува инфлацијата, а го забавува заздравувањето на светот од пандемијата ковид-19, соопшти денеска Меѓународната агенција за енергија.
„Рекордните цени на јагленот и гасот, како и прекините на струја, го поттикнуваат енергетскиот сектор и енергетски интензивните индустрии да се свртат кон нафтата за да ги задржат светлата запалени“ се вели во месечниот нафтен извештај на меѓународната агенција.
Во него е посочено дека повисоките цени на енергијата го зголемуваат инфлаторскиот притисок кој заедно со прекините во снабдувањето со електричната енергија, може да доведат до пониска индустриска активност и забавување на економското закрепнување.
Како резултат на тоа, сегашните прогнози за следната година за глобалната побарувачка за нафта се дека нафтениот пазар ќе закрепне и ќе го достигне нивото пред пандемијата.
Меѓународната агенција за енергија проценува дека ОПЕК ќе испумпува 700.000 барели дневно под проценетата побарувачка за нафта во четвртиот квартал оваа година. Тоа значи дека побарувачката ќе ја надмине понудата барем до крајот на 2021 година.
Зголемувањето на побарувачката во изминатиот квартал доведе до најголемо повлекување на залихите на нафтени производи во последните осум години, се вели во извештајот.