Претседателот на Соединетите Американски Држави Џо Бајден синоќа разговарал со претседателката на Европската комисија Урсула Фон дер Лајен, соопшти Белата куќа. Една од темите за разговор било и проширувањето на ЕУ со земјите од Западен Балкан.
„Двајцата лидери исто така дискутираа за Западен Балкан и претседателот Бајден ja пренесе неговата силна поддршка за продолжување на пристапниот процес за земјите од тој регион“, рекол Бајден, а пренесува Белата куќа.
Бајден и Фон дер Лајен разговарале и за поддршката за Европската унија, посветеноста на продолжување на спроведувањето на договореното на самитот меѓу ЕУ и САД, важноста на заедничката соработката во борбата против ковид-19, климатските промени и други теми.
Телефонскиот разговор доаѓа непосредно пред утрешниот самит ЕУ-Западен Балкан кој ќе се одржи во Брдо, Словенија. Таму лидерите на шесте балкански земји- Македонија, Албанија, Црна Гора, Србија, Босна и Херцеговина и Косово, со високите европски претставници ќе разговараат за нивната перспектива во унијата.
Радио Слободна Европа објави дека утре на маса ќе биде ставена декларација во која редакцијата имаше увид и се наведува дека „ЕУ ја потврдува својата недвосмислена поддршка за европската перспектива на Западен Балкан и ја поздравува посветеноста на партнерите од Западен Балкан кон европската перспектива, што е во наш заеднички стратешки интерес и останува наш заеднички стратешки избор“.