Извештајот од Оддел за криминалистичко технички испитувања и вештачења при Министерството за внатрешни работи од извршениот увид на местото на пожарот во Модуларната Ковид болница во Тетово денеска е пристигнат во Основното јавно обвинителство (ОЈО) Тетово.
Како што информираат од ОЈО, обвинителите ќе го разгледаат и анализираат извештајот, а се очекува да пристигнат и извештаите и податоците за кои обвинителството има издадено наредби и насоки.
„Дејствијата за утврдување на причините за настанатиот пожар кои ги преземаат петмината обвинители континуирано се одвиваат. Во момeнтов се врши сослушување на членови на Комисии за импелементација, следење и технички прием на модуларните монтажни контејнери, кои биле со решение формирани од Министерството за труд и социјална политика“, информираат од ОЈО.
Извештајот од германските експерти ќе биде доставен за 10-15 дена
Од извештајот за причините за избувнувањето на пожарот кој се случи на Осми септември во модуларната болница во Тетово во кој животот го загубија 14 луѓе ќе зависи и одлуката на премиерот Зоран Заев за понудените оставки од министерот за здравство Венко Филипче, заменик министерот Илир Хасани и двајцата директори на Тетовската болница.
Премиерот Заев, денеска изрази очекување дека форензичките извештаи и анализите на вештачењето за пожарот во модуларната болница во Тетово се при крај и ќе бидат објавени час поскоро.
„Колку е поскоро, толку подобро, за да ги решиме сите дилеми. Животот продолжува, политичарите се во кампања, се случуваат секојдневни активности. Ред е да се објави тој извештај за да можам и јас да го кажам својот став по повод понудените оставки од министерот, заменик-министерот“, рече Заев, одговарајќи на новинарско прашање по промоцијата на новите деловни простории на „Пивара“ Скопје.
Во истрагата, покрај домашните истражни органи, се вклучија и германски експерти.