Претседателката на Европската комисија, Урсула фон дер Лејен, денеска во Приштина изјави дека Косово и Србија мора да работат на конструктивен дијалог, со цел да се намалат тензиите во општините со мнозинство Срби во северно Косово.
Фон дер Лајен денеска е во Косово, како дел од регионалната посета на Западен Балкан. Таа по состанокот со косовскиот премиер Албин Курти истакна дека секој мора да работи на изградба на заедничка иднина.
"Додека зборуваме овде, преговарачите се во Брисел и тие преговараат за тоа. Тоа е најдобриот начин да се продолжи напред", рече фон дер Лајен.
Главните преговарачи на Косово и Србија се во Брисел за да разговараат за следните чекори за смирување на тензиите во северно Косово, кои произлегоа по одлуката на Владата во Приштина да воведе мерки за реципроцитет за регистарски таблички од Србија.
Премиерот Курти на прес-конференцијата рече дека на претседателката на Европската комисија и ја пренел информацијата дека Србија ја подигнала својата борбена готовност во гарнизоните на Рашка и Нови Пазар. Тоа се градовите на југот на Србија, во близина на границата со Косово и првите градови по граничните премини Јариње и Брњак.
Курти, исто така, рече дека Србија набавува оружје од Русија и Кина, додека пак прима донации од Европската Унија.