Претседателите на ЛДП и на ДОМ, Горан Милевски и Маја Морачанин потпишаа договор за заеднички настап на локалните избори. Тие го формираа „Движењето Одлучно за промени“ за настап на изборите закажани за 17 октомври.
„Коалицијата има над 50 кандидатски листи за локалните избори, со голем број на граѓански активисти и непартиски лица, со што оваа коалиција се позиционира како трета политичка сила на македонската политичка сцена“, наведуваат од Либерално демократската партија (ЛДП).
До сега тие ги најавија кандидатите за градоначалници на Ѓорче Петров – Љупчо Јаневски, на Кисела Вода – Ѓулистана Марковска, на Гевгелија – Виктор Петков, на Прилеп – Славе Петрески и на Штип – Ванчо Санев.
Од „Движењето Одлучно за промени” најавуваат дека во недела ќе го соопштат својот кандидат за градоначалник на Скопје и носителот на советничката листа.
ЛДП и ДОМ се дел од владејачката коалиција, но на локалните избори настапуваат самостојно.