Албанскиот комитет на експерти за справување со пандемијата, по анализа на состојбата со Ковид-19, донесе одлука за воведување нови ограничувачки мерки за влез во земјата а го зголеми и времетрањето на полицискиот час, кои стапуваат во сила од први, односно шести септември.
„Почнувајќи од први септември, полициски час ќе трае од 23 до 6 часот, додека од шести септември, граѓаните кои влегуваат во Република Албанија од сите гранични премини мора да исполнуваат еден од следниве три услови: да поседуваат пасош за вакцинација, при што од денот на ревакцинацијата треба да изминале најмалку две недели, негативен ПЦР тест не постар од 72 часа, брз антиген тест од 48 часа или потврда дека прележале Ковид, валиден до 6 месеци по заздравувањето“, иформираше Мира Ракацоли, претседателка на комитетот и заменик министерка за здравство.
Таа додаде дека овие правила важат и за сите оние кои транзитираат низ Албанија, додека децата до 6-годишна возраст не подлежат на овие правила.
„Албанските државјани кои постојано живеат во Албанија а кои се враќаат од престој во друга земја и немаат еден од горенаведените документи, мора да се изолираат 10 дена и да го известат здравствениот орган да изврши тестирање на крајот од периодот на изолација. По проценката на граѓанската одговорност за заштита на јавното здравје одлучивме да препорачаме воспоставување задолжителна вакцинација за групите кои се најзагрозени и особено од ширењето на инфекцијата, почнувајќи од медицински персонал, просветни работници и студенти“, додаде таа.
Според неа очекуваат во септември кој е отворен месец за вакцинација оваа категорија граѓани да се имунизираат и до 30 септември да го достават сертификатот во нивниот колектив а за студентите во канцелариите определени од високото образование копија од картичката за вакцинација издадена од е-Албанија.
“По овој датум, за оние кои тоа нема да го направат, ќе биде потребно периодично тестирање на ПЦР за да се потврди инфективноста. Казната за периодично поднесување на ПЦР ќе започне по 30 -ти септември. Наредбата за употреба на маски во затворени простории, во трговски центри, супермаркети, продавници, јавен превоз и на сите оние места каде што не е обезбедено физичко дистанцирање останува во сила“, посочи Ракацоли.
Во сите случаи кога не се почитуваат препорачаните мерки, ќе следуваат и казни. Така, за неносење маска во препорачаните простории следува парична казна во износ од 3.000 леки( 25 евра), доколку лицето е затекнато првпат, доколку пак непочитувањето е повторено казната е пет илјади леки.