Министерството за образование и наука денеска соопшти дека првпат материјалите за учење по македонски јазик за четврто одделение ќе бидат дигитализирани. Тоа значи дека многу различни содржини од програмското подрачје Јазик – граматичкиот дел, ќе бидат изучувани и совладани преку дигитални квизови, објаснува авторката на учебникот проф. д-р Јасмина Делчева – Диздаревиќ.
„Преку квизовите на учениците ќе им биде овозможено сами да доаѓаат до точните решенија. Веќе подолго време педагошката теорија ни зборува за предностите и придобивките на програмираната настава. До сега, немавме начин теоријата да ја преточиме во пракса. Денес, благодарение на дигитализацијата, тоа конечно ни е овозможено“, вели Делчева – Диздаревиќ.
- Учениците од прво и четврто одделение годинава ќе учат по нова програма
- Наставниците подготвени, но чекаат насоки за старт на учебната година
Според авторката, при изработката на материјалот за учење се водело грижа за трите принципи на кои се заснова новата Концепција за основно образование, а тие се: инклузивност, родова рамноправност и интеркултурност.
Авторката потенцира дека за разлика од материјалите за прво одделение каде вниманието главно е насочено кон описменувањето, тука во материјалите за четврто одделение се работи најмногу на логичкото и изразното читање.
Од МОН посочуваат дека во согласност со потребите на современиот свет, во овие материјали акцентот е ставен и на медиумската култура и медиумската писменост.
„Развиена медиумска култура и медиумска писменост е неопходен предуслов за функционирање во современиот свет. Преку бројни активности кои го поттикнуваат логичкото размислување, учениците не само што подобро ќе ги разбираат информациите кои се насекаде околу нив, туку и ќе научат како да ги применуваат во секојдневниот живот, да изработуваат плакати и извештаи, се вели во соопштението од МОН.