Во Собранието, денеска, стартуваше општата расправа по дополнетиот ребаланс на Буџетот за годинава. Дополнетиот ребаланс ги содржи и осумте амандмани кои беа усвоени на Комисијата за финансирање и буџет. Расправата може да трае пет дена.
Владата ќе собере 100 милиони евра повеќе, а ќе потроши 300 милиони евра од првично планираното. Со Ребалансот е предвидено буџетската дупка да се зголеми за дополнителни речиси 200 милиони евра и да достигне 750 милиони евра. Кусокот пари во државната каса ќе се покрива со задолжувања дома и во странство.
Со ребалансот се предвидуваат повеќе пари за капитални расходи за 24 отсто, како и дополнителни средства за мерките за поддршка на домаќинствата и стопанството, за здравството и за процесот на имунизација на населението, зголемена поддршка на земјоделството и социјално ранливите категории.
Министерот за финансии Фатмир Бесими образложувајќи го ребалансот на Буџетот пред пратениците рече дека здравјето на граѓаните, здравата економија, како и здрави финансии и општество воопшто остануваат клучни приоритети за оваа година.
Опозициската партија, ВМРО- ДПМНЕ, пак, смета дека со ребалансот граѓаните ќе бидат втурнати во уште поголема сиромаштија. Задолжувањето на земјата се зголемува, а економски раст нема, сметаат од ВМРО-ДПМНЕ.
Владата и со ребалансот очекува економскиот раст годинава да биде 4,1 отсто.