Авганистанската влада соопшти дека го одбила талибанскиот напад врз стратешката гранична точка кон Пакистан, отфрлајќи ги тврдењата на милитантите дека тие го окупирале граничниот премин во серија територијални освојувања, пред крајниот рок за повлекување на американските трупи од земјата.
"Талибанските терористи се движеа во близина на пограничната област неколку пати. Безбедносните сили го одбија нападот", рече портпаролот на Министерството за внатрешни работи Тарек Аријан.
Талибанска офанзива во Авганистан, Кандахар под опсада
Изјавата следува како одговор на тврдењето на Талибанците претходно истиот ден во кое се наведува дека милитантите го окупирале стратешкиот граничен премин Спин Болдак во провинцијата Кандахар.
„Муџахедините го зазедоа важниот пограничен град Веш во Кандахар. Со ова, патот меѓу Спин Болдак и царинскиот пункт Чаман и Кандахар влезе под контрола на муџахедините“, рече талибанскиот портпарол Забихула Муџахид.
Тој исто така додаде дека трговците и жителите биле убедени дека нивната „безбедност е загарантирана“.
Ситуацијата на теренот не можеше да се провери веднаш, но извор од пакистанската безбедност изјави дека талибанското знаме се вее над градот, а сликите објавени на социјалните мрежи покажуваат талибански борци во делот што се чини дека е пограничен град меѓу Авганистан и Пакистан.