Заменик помошник секретарот за европски и евроазиски работи во американскиот Стејт департмент Метју Палмер денеска во Охрид изрази разочарување што не било решено прашањето за отворање на првите меѓувладини конференции за Северна Македонија и Албанија, и покрај, како што рече, силното застапување и разумните решенија на португалското претседателство и на европските партнери.
Палмер денеска во Охрид зборуваше на панелот насловен „На патот до подобро поврзан и интегриран регион – Кој е ризикот? Како да стигнеме таму?“ во рамки на првата Меѓународна конференција на Преспа форумот за дијалог. На форумот се обрати и германскиот државен министер за Европа Михаел Рот, кој исто така изрази жалење што Советот на министри на ЕУ не донесе одлука за отпочнување на преговорите за членство на Северна Македонија и Албанија.
Палмер наведе дека непочнувањето на преговорите на двете земји влијае и на вложувањата на САД и ЕУ во регионот, но дека придонесува и за зголемување на скептицизмот во регионот.
„Нашите геополитички конкуренти се обидуваат да го нарушат кредибилитетот меѓу САД и ЕУ, а исто така и самиот регион се сомнева во интегритетот на нашата колективна определба“, истакна Палмер.
Германскиот државен министер за Европа Михаел Рот изјави дека длабоко жали што Советот на министри на ЕУ не донел одлука за отпочнување на преговорите за членство на Северна Македонија и Албанија „заради ставот само на една држава“, рече Рот.
Рот наведе дека особено Северна Македонија вложила огромни напори за создавање мултиетничко општество, 20 години после потпишувањето на Охридскиот рамновен договор.
„Со оглед дека ова е долг пат за секое општество, мораме да инвестираме повеќе напори секој ден за да го зајакнеме мирното општество. Северна Македонија и Грција направија историски чекор со потпишувањето на спогодбата од Преспа пред три години. Ова е исклучителен успех и служи како пример што може да се постигне и дека може да се решат долгогодишни конфликти со храброст и државност“, рече Рот.
Палмер исто така зборуваше за важноста на „историскиот“ Договор од Преспа потпишан меѓу Северна Македонија со Грција и за Договорот за добрососедски односи со Бугарија, велејќи дека тоа се примери за поголем регионален ангажман на Северна Македонија во корист на нејзините граѓани.
Тој рече дека долгогодишната визија на САД во регионот била и ќе остане фокусирана на регион во мир со себе и соседите.
„Регион којшто е стабилен, проспетитетен и интегриран во евроатлатнската рамка“, рече Палмер.
Преспа форумот за дијалог е организиран од Владата на Северна Македонија и на него присуствуваа лидери од земјата и од регионот, но и претставници на бројни земји и организиции. Првата меѓународна конференција денеска се одржува во Охрид, а ќе биде продолжена утре во Отешево. На настанот учествуваат околу 300 гости и ќе се обратат на повеќе панел дискусии, а меѓу нив се официјални лица и поранешни претставници на НАТО, администрацијата на САД, ЕУ и претставници на невладини организации.