Сојузот меѓу САД и Велика Британија треба да биде познат како „неуништлив“, изјави британскиот премиер Борис Џонсон на првата негова средба со американскиот претседател Џо Бајден.
Џонсон, кој пристигна во Корнвол на самитот на лидерите на Г7, рече дека имал „одлични“ разговори со Бајден.
Самитот ќе започне подоцна, а на дневен ред се вакцините и климатските промени.
Џонсон инсистираше на тоа дека американскиот претседател не му замерил поради тензијата по Брегзит во Северна Ирска. Сепак тој вели дека Бајден е „длабоко загрижен“ за ситуацијата.
Двајцата лидери се сретнаа во заливот Карбис во Корнвол пред самитот Г7, на кој за прв пат од почетокот на пандемијата на коронавирусот ќе се соберат лидерите на Канада, ЕУ, Франција, Германија, Италија, Јапонија, САД и Велика Британија .
Пред состанокот, Џонсон вети дека Велика Британија ќе донира повеќе од 100 милиони вакцини во посиромашните земји во текот на следната година, додека Бајден вети половина милијарда дози вакцини Фајзер за 92 земји со ниски и средни примања и на Африканската унија.
Државите од Г7 се очекува да се согласат да обезбедат една милијарда дози вакцина против Ковид-19 во обид да се стави крај на пандемијата во 2022 година.