Бугарскиот министер за надворешни работи Светлан Стоев во однос на европската интеграција на Северна Македонија, изјави дека позицијата на Бугарија е јасна, доследна и предвидлива и таа не е променета, јави дописникот на МИА од Софија.
Тој истакна дека техничката Влада на Бугарија се раководи од Рамковната позиција и Декларацијата на Народното собрание од октомври 2019 година и оти 85 отсто од граѓаните ја поддржуваат таа позиција.
Стоев вели дека Бугарија секогаш покажувала волја за конструктивен и прагматичен дијалог со Скопје и дека ќе продолжат да работат на обновувањето на довербата.
Бугарскиот министер додаде дека очекуваат правни гаранции за почитување на Договорот од 2017 и конструктивен одговор од Скопје за долгорочно решение на прашањето.
Премиерот Зоран Заев пред два дена рече дека во разговорите со Бугарија ништо не се крие и не се разговара поразлично и оти на маса е португалскиот предлог што македонската страна го оцени како добра основа да се најде решение за билатералното прашање со Софија. Тој повтори дека доколку македонскиот јазик и македонскиот идентитет се на маса, македонската страна нема да преговара.
Поради блокада од Бугарија, нема датум за почеток на преговорите на Македонија и ЕУ за влез во Унијата.