Европа мора да ги одржи ветувањата и не треба да има доцнење во пристапниот процес за Северна Македонија и Албанија, порача алтернативниот министер за надворешни работи на Грција Милитиадис Варвициотис од Делфи Форумот во Атина и паралелно истакна дека тие не се согласуваат со евентуално одвојување на Скопје и Тирана на патот кон ЕУ, јави дописничката на МИА од Атина.
Варвициотис учествуваше на панел дискусијата заедно со вицепремиерот задолжен за европски прашања Никола Димитров и потенцираше дека „со приклучувањето на Албанија и Северна Македонија во ЕУ, Грција конечно ќе има копнени граници со други земји-членки“.
„Важно е процесот да почне веднаш за сите земји кандидати. Ние не сме расположени да прифатиме никакво одвојување меѓу Северна Македонија и Албанија, ова го гледаме како катастрофален пристап за регионалната стабилност“, порача алтернативниот шеф на грчката дипломатија.
Тој додаде дека новиот процес на проширување од минатата година, „треба да биде веродостоен процес и треба да биде побрз процес во споредба со стариот“.
Од ЕУ стигнаа пораки дека Албанија и Македонија ќе бидат раздвоени на патот кон ЕУ, иако во последните години одеа во пакет. Тирана оди напред, а Скопје ќе треба да се договори со Софија ако сака одблокирање на процесот за пристапување кон ЕУ. Но потоа одделни функционери на ЕУ и одделни земји членки застанаа зад ставот дека Албанија и Македонија не треба да се раздвојуваат.
Во меѓувреме, пак, нема многу надежни дека може да има договор со Бугарија, оти и преодната влада таму остана на ветото кон Македонија.