Полицијата во Турција изврши операција против членови на организирана криминална група, јавува агенцијата Анадолија. Во операцијата, чиј центар бил во Истанбул, била спроведена во пет области низ Турција и при тоа полицијата изврши рации на 121 адреса со налози за приведување на 63 осомничени лица, вклучувајќи го Седат Пекер, за кого беше утврдено дека е водач на криминалната група. За Пекер се вели дека е во странство.
Откриено е дека осомничените активно учествувале во криминални активности – вклучително грабеж, напаѓање, мито и други кривични дела – и биле вклучени во формирање организирана криминална група, јави агенцијата Анадолија и додава дека полициската акција била поддржана од беспилотни летала и тимови за специјални операции.
Името Седат Пекер се поврзува и со акцијата спроведена во Македонија пред неколку дена и во која беа уапсени деветмина полициски службеници осомничени за фалсификување пасоши. Опозициската ВМРО-ДПМНЕ ја обвини власта дека, како што рекоа од опозициската партија, „им давала лажни пасоши на познати криминалци, меѓу кои и Пекер“. МВР ги негираше обвинувањата со контра-обвинување дека „од ВМРО-ДПМНЕ предвреме објавиле информации за да ја саботираат акцијата наречена Двојник“.