Денеска би можело да се одржи седница на Собранието на чиј дневен ред ќе се најдат измените на Законот за попис, со кој тој треба да се одложи за септември, како што претходно се договорија лидерите на СДСМ и на ВМРО-ДПМНЕ, Зоран Заев и Христијан Мицкоски. „Сите претставници на пратеничките групи и претставниците на партиите застапени во Собранието биле подготвени да се одржи седница на која ќе се најдат измените на Законот за попис, освен Алијансата за Албанците и Алтернатива, се наведува во соопштението на претседателот на Собранието Талат Џафери издадено по вчерашната координација. Според законот кој се уште е во сила пописот на населението треба да почне денеска и да трае до 21 април.
Измените на Законот за попис поминаа на владина седница
Министерот за правда Бојан Маричиќ вели дека ако попишувачите излезат на терен и соберат некакви податоци, тие ќе бидат земени предвид. Заев и Мицкоски на лидерска средба во понеделникот се договорија пописот да се одржи од петти до 30 септември. На вчерашната координација против одржувањето на седницата беше координаторот на пратеничката група Алијанса за Албанците Алтернатива зашто сметал дека одложувањето на пописот за септември не е поради актуелната здравствена состојба, туку дека станува збор за политичка одлука.