Софија очекува Скопје да го брани правото на секој граѓанин на слободно самоопределување. Ова е став на бугарското Министерство за надворешни работи (МНР) по повод, како што се наведува, честите манифестации на говор на омраза и дискриминација во Северна Македонија, пренесе МИА. Реакцијата од бугарското МНР следува по неколкудневно објавување коментари во јавност и на социјалните мрежи на адреса на македонскиот претставник на Евровизија, Васил Гарванлиев, кој изјави дека „има и бугарско потекло“.
Вицепремиерот и министер за надворешни работи Екатерина Захариева го повикала заменик-шефот на амбасадата на Република Северна Македонија во Софија Владимир Крастевски на разговор во Министерството за надворешни работи. На состанокот присуствувала и в.д. директорката на Дирекцијата за Југоисточна Европа Ива Крулева, јави МИА.
„Бугарските дипломати изразија длабока збунетост и разочарување од големата негативна кампања во Република Северна Македонија против претставникот на Скопје на Евровизија 2021 година, Васил Гарванлиев. Бугарија ќе продолжи да ги вложува сите неопходни напори во согласност со принципите на меѓународното право за да ги заштити правата на бугарските граѓани и граѓаните кои прогласуваат бугарски идентитет, каде било во светот“, соопшти бугарското Министерство за надворешни работи.
Минатата недела и бугарскиот министер за одбрана Красимир Каракачанов во врска со коментарите за Гарванлиев, рече дека ако „Скопје не го сака за претставник за Евровизија, вгодина Бугарија ќе го земе нејзе да ја претставува“.