Од неговиот дом во скопската населба Водно поранешниот шеф на Управата за безбедност и контраразузнавање Сашо Мијалков со полициска придружба е спроведен во истражниот затвор во Шуто Оризари, потврдија од полицијата за МИА.
До ова доаѓа откако судот, по советување и гласање го прифати предлогот на Обвинителството, за укинување на мерката куќен притвор и му одреди ефективен притвор, до правосилност на пресудата.
Вашиот пребарувач не подржува HTML5
Пресуди за „Таргет-Тврдина“
Мијалков денеска беше осуден на 12 години казна затвор за масовното нелегално прислушување од 2008 до 2008 година. Освен Мијалков, во случајот „Таргет-Тврдина“, на по 15 години затвор се осудени поранешните високи службеници во УБК Горан Грујевски и Никола Бошкоски, кои се во бегство во Грција, потоа поранешниот шеф на кабинет на Мијалков, Тони Јакимовски доби казна затвор од шест години, поранешната министерка за внатрешни работи Гордана Јанкулоска беше осудена на четиригодишна затворска казна, поранешна началничка во Министерството за внатрешни работи Надица Николиќ доби три години затвор, а останатите поранешни вработени во УБК добија условни казни.