Од досега испорачаните 128 милиони вакцини низ светот, повеќе од три четвртини вакцинирани има само во десет земји, кои сочинуваат 60 отсто од глобалниот бруто домашен производ (БДП). Тоа значи дека во речиси 130 земји со 2,5 милијарди луѓе, се уште не е пристигната ниту една вакцина против ковид-19, објави Светската здравствена организација (СЗО) на својата веб страница.
СЗО за ова вели дека е „самопоразителна стратегија, која ќе чини животи и егзистенции“, а на вирусот ќе му се овозможи да мутира и да го поткопува глобалното економско закрепнување.
Затоа СЗО заедно со својот партнер УНИЦЕФ ги повика светските лидери да гледаат подалеку од своите граници и да спроведуваат вакцинација поради завршување на пандемијата и ограничување на можноста за мутација, објави СЗО.
Македонија е една од државите во кои што се уште не пристигнале вакцини против ковид-19. Се очекуваат 200 илјади вакцини од кинескиот Синофарм, вакцини од Фајзер што ни ги отстапува Србија и вакцини преку системот Ковакс. Кај нас од завчера почна пријавувањето за вакцина на интернет сајтот vakcinacija.mk.