Директорот на српската Канцеларија за Косово, Петар Петковиќ изјави дека Белград во денешните разговори со Приштина повторно инсистирал на прашањето за формирање на Заедницата на српски општини (ЗСО).
„За нас, ЗСО е клучно прашање и ако зборуваме за успешно продолжување на дијалогот, потребно е да се формира ЗСО“, изјави Петковиќ по новата рунда на техничкиот дијалог во Брисел.
Петковиќ оцени и дека било добро што по седум и пол години зборувале за имотните и финансиски побарувања, бидејќи тоа е многу чувствително и сложено прашање. Тој истакна дека Белград инсистира на дијалог и дека секогаш кога ќе добие покана, делегацијата ќе отиде во Брисел да разговара за сите клучни прашања на дневниот ред.
Преговорите се одвиваат со посредство на специјалниот пратеник на Европската унија за дијалогот меѓу Приштина и Белград, Мирослав Лајчак, а координаторот на косовската Влада за дијалогот е Скендер Хисени. Косовската Влада претходно соопшти дека на денешните преговори не е постигнат видлив напредок во приближувањето на ставовите.