Покрај смртта на 41-годишната пациентка од Штип, се испитува смртта и на уште десетина пациенти кои починале по компликации од ковид-19, соопшти денеска Државниот санитарен и здравствен инспекторат (ДСЗИ).
Од ДСЗИ велат дека во тек се инспекциските надзори за починати пациенти од Тетово, Кавадарци, Битола и Крива Паланка. Од страна на ДСЗИ, во наредниот период ќе бидат извршени за уште четири пациенти починати од ковид-19.
Во врска со случајот со 41-годишната пациентка која на 14 ноември почина по компликации од ковид-19 на Инфективното одделение во Клиничката болница во Штип, ДСЗИ со решение му наредиле на директорот да се состане Комисијата за следење на квалитет која ќе ја утврди фактичката состојба за спроведеното лекување на пациентката и околностите кои довеле до смртен исход.
„Директорот е задолжен во рок од три дена, писмено да го извести ДСЗИ за наодот од извршената контрола на Комисијата. Независно од работата на Комисијата, во текот на денешниот ДСЗИ ќе иницира стручен надзор над работата на здравствената установа и здравствените работници во врска со третманот на пациентката“, стои во соопштението од ДСЗИ.