Министерот за здравство Венко Филипче денеска изјави дека верува дека со новиот пакет на мерки, рестрикција, зголемување на ингеренциите на инспекторатите и апелот до граѓаните да се придржуваат до мерките, ќе даде резултат. Доколку тоа не се случи, според него, следниот чекор е карантин, но се надева дека таквата мерка ќе биде избегната.
„Следниот чекор е целосен карантин, се уште сме далеку, но можно е“, рече Филипче.
За новиот пакет мерки, според него ќе се разговара уште викендов, а редовната седница на Владата е закажана за вторник. Одговарајќи на прашање поврзано со правните дилеми за мерките како што е забрана за повеќе од четири лица во посета на нечиј дом, Филипче рече дека искуствата се извлекуваат од досегашните случувања и во периодот којшто следи може да има семејни собири со голем број на луѓе од кои може да поттикнат голем број на кластери и логично е тоа да се забрани. Во однос на носењето маски и на отворено тој порача дека се користат искуствата од други земји.
„Епидемиолошката слика во Италија е променета откако е донесена задолжителна одлука за носење маски на отворено и веруваме дека тоа може сериозно да го забави растот на нови случаи, инаку ќе мора да бидеме принудени на дополнителни рестрикции. Во дополнителните рестрикции во нашиот план освен намалување на капацитетот на исполнетост во јавниот превоз е ограничување на работа на одредени економски субјекти, компании, угостителски објекти, но се надеваме дека нема да мора до таму да стигнеме и дека овој втор пакет на рестриктивни мерки ќе даде некаков ефект“, рече Филипче.
Анализите за смртност кај пациентите со Ковид-19, според него, покажале дека висок процент на смртност кај постари пациенти, кај пациенти кои доаѓаат со лоши параметри и други коморбидитети.
Филипче истакна и дека голем е бројот на пациенти кои се примаат во болниците, само вчера во болницата „8 Септември“ биле примени петмина пациенти, а на Инфективната клиника во Скопје се примени 13 пациенти. Според него, може да се менаџираат болниците, има слободни десетина кревети на Инфективната клиника, но целта е растечкиот тренд да се забави, а се спрема и модуларната болница.