Европската унија им порача на властите во Подгорица дека внимателно го следи развојот на случувањата во Црна Гора, особено во Будва, со повик до сите инволвирани страни да покажат воздржаност и да го почитуваат владеењето на правото.
Портпаролката на Европската комисија, Ана Писонеро Хернандес истакна дека сите евентуални повреди на законот треба да ги решаваат надлежните локални власти, согласно националното законодавство и релевантните меѓународни стандарди.
„Како што е претходно соопштено, ЕУ ги повикува сите политички актери да покажат почитување кон владеењето на правото и демократските принципи, и да покажат политичка зрелост со цел сами да најдат одржливо решение за актуелната ситуација, преку дијалог и во духот на меѓусебно почитување“, порача Хернандес.
Синоќа црногорската полиција привела десетици демонстранти по синоќешните просрпски протести во Подгорица и во неколку града во државата. Протестите беа организирани од опозициски сили кои бараат поблиски односи со Србија и Русија.
Црногорската полиција уапсила 41 лице за предизвикување инциденти во неколку градови, додека 54 лица ќе бидат кривично и прекршочни одговорни, соопшти полициската управа. Се наведува дека граѓаните вчера се собирале без претходна регистрација на јавни собири и без одобрение, и тоа во Будва, Подгорица, Никшиќ, Бар, Беране и Бјело Поље и оти предизвикале инциденти во тие општини. Тие се обвинети за блокирање на сообраќајот и нарушување на јавниот ред, каменување, употреба на димни бомби и стаклени шишиња против припадници на полицијата.
Синоќешните протести беа рефлексија на политичките тензии во Црна Гора во пресрет на парламентарните избори кои се закажани на 30 август.