Министерот за здравство, Венко Филипче изјави дека Комисијата за заштита од заразни болести врз основа на своите анализи ќе препорача дали и кога ќе има услови за безбедно одржување на избори. Тој на денешната прес конференција рече дека кога и да се одржат избори тие ќе треба да се спроведат по строг протокол за заштита на здравјето на луѓето. Министерот ги негираше шпекулациите дека се намалува бројот на тестови за Ковид -19 заради политички причини.
Во изминатото деноноќие направени се 113 тестирања, а потврдени се 7 нови случаи на Ковид-19.
Филипче најави дека во тек се консултациите за постепено враќање на животот во нормала. Но како што вели, во иднина ќе имаме ново свето тројство- носење маска, држење дистанца и дезинфекција на рацете.
За утре најави состанок на директорите на клиниките за да може тие да почнат да функционираат со цел капацитет, но притоа да се запазуваат мерките и да се избегнуваат гужви. Министерот за здравство рече дека од 235 заболени здравствени работници 184 се оздравени, со два негативни теста и сите се вратени на работа, со што клиниките и болниците кои имаа проблеми во функционирањето сега работат. Тој рече дека и враќањето на работите во нормала го отвора и прашањето за отворање на градинките, за што ќе се разговара неделава за да се донесе план.