Економските изгледи на земјата значително се влошија како резултат на пандемијата со Ковид 19 и се очекува реалниот БДП да се намали за 3,4%, соопшти министерката за финансии, Нина Ангеловска, на денешната прес-конференција, на која ја презентираше новата проекција за македонската економија.
Според Ангеловска, буџетските приходи во април изнесуваат 14,2 милијарди денари и се намалени за околу 20% споредено со април минатата година поради корона-кризата. Даночните приходи во април се намалени за 31% во однос на лани.
„Најголем пад има кај приходите од наплата на ДДВ, и тоа 43%, потоа следуваат акцизите со пад од 40% и царините со пад 26%. Кај персоналниот данок има пад од 11,7%, додека придонесите се на исто ниво со април лани. Натфрлување има кај данокот на добивка, чија што наплата е реализирана со плус 3,6%“, рече Ангеловска.