Лидерската средба би се одржала во периодот меѓу 10 и 12 мај, а потврда за учество на неа дале лидерите на СДСМ и ВМРО-ДПМНЕ, Зоран Заев и Христијан Мицкоски, како и лидерите на албанските политички партии и од власта и од опозицијата. Ова вчера во интервју за „360 степени“ на Алсат М го изјави претседателот Стево Пендаровски, кој посочи дека телефонски разговарал и со Заев и со Мицкоски.
Претседателот Пендаровски, во интервјуто одговара и на прашање за тоа која е потребата тема на лидерска средба да бидат изборите, кога владата донесе уредба за продолжување на изборните дејствија по завршувањето на вонредната состојба.
„Не би сакал да им наметнувам нови задачи од областа на правото на овие што се правници од власта и од опозицијата, меѓутоа, постои размислување дека уредбите со законска сила важат додека важи вонредната состојба. Потоа, за да евентуално продолжат да важат треба Собранието да ги потврди. Ако ги потврди ќе продолжат да важат, ако не, нема да важат. Тоа е едно од правните мислења кои ми го кажуваат, ми го советуваат тие што мене ме советуваат во правната сфера. Не велам дека тоа е дефинитивна вистина, меѓутоа, само сакам да го кажам тоа“, истакна шефот на државата.
Пендаровски истакна дека уредбите кои ги носи Владата имаат сила на закон, но и дека Владата има законодавна моќ само додека има вонредна состојба.