Исус лекар и мобилни апликации

БРАЗИЛ - Статуата на Исус Христос во Рио де Жанеиро, Бразил, на католичкиот Велигден беше виртуелно облечена во лекарска облека, со што градот на тој начин им заблагодари на болничарите од цел свет, за сѐ она што го прават во борбата против коронавирусот.

МАКЕДОНИЈА - За време на викендот, вклучително и понеделник, од петок 17 април во 16 часот, до вторник 21 април во 05 часот, се забранува движењето за сите граѓани. Останува активна забраната за движење за сите граѓани на ниво на целата територија, секој работен ден, од понеделник до петок, од 16:00 часот до 05:00 часот наредниот ден, одлучи Владата.

МАКЕДОНИЈА - Четворица пациенти со Ковид-19 починаа на Клиниката за инфективни болести, информираше Министерството за здравство. Двајца се од Скопје – пациентка на 79 години и пациент на 63-годишна возраст, 58-годишен од Велес и 67-годишен пациент од Прилеп, соопшти МЗ. Во последните 24 часа се ригистрирани 26 новозаразени.

СРБИЈА / МАКЕДОНИЈА - Србија од денеска почнува со примена на системот на т.н. зелени коридори на одредени гранични премини, меѓу кои и со Северна Македонија, во рамките на ЦЕФТА регионот, а кога ќе се исполнат пропишаните технички услови, во овој систем ќе бидат вклучени и други премини.

САД - Со ретвитната порака на Твитер - Време е за отказ – FireFauci - американскиот претседател Доналд Трамп му одговори на главниот американски експерт за инфективни болести Антонио Фаучи, откако епидемиологот рече дека повеќе животи би можеле да се спасат од коронавирусот, доколку земјата беше затворена порано, пренесе АП.

БЕЛГИЈА - Еврокомесарот за економија, Тиери Бретон, изјави дека принудните мерки за следење преку телефон, кои имаат за цел да ги пронајдат луѓето заразени со коронавирусот, не доаѓаат предвид, иако неколку земји работат на мобилни апликации кои преку паметните телефони, ќе овозможат идентификација на заразени лица и предупредување на лица кои биле во контакт со некои од заразените.

РУСИЈА - Русија објави најголемо дневно зголемување на случаи на коронавирус од почетокот на пандемијата, по што руските власти најавија ограничувања за велигденските црковни служби во и околу Москва за да го задржат ширењето на оваа болест. Руската православна црква, која ќе го прослави Велигден идната недела им нареди на црквите да ги затворат своите врати пред Светата недела.

СЕВЕРНА КОРЕЈА - Севернокорејскиот лидер Ким Џонг Ун изврши голема реконструкција на владата, односно во Комисијата за државни работи каде што измени третина од нејзините членови, објавија денеска официјалните севернокорејски медиуми.