Високиот командант на иранската Револуционерна гарда се закани дека ќе уништи локации поддржани од САД без да прецизира точно кои. Оваа закана следува по минатонеделниот американски воздушен напад во кој загина иранскиот генерал Касем Солејмани.
Генерал мајор Хосеин Салами, пак, ова го кажа денеска пред илјадниците луѓе кои се собраа на главниот плоштад во иранскиот град Керман за да присуствуваат на погребот на генералот Солејмани.
Насобраните во Керман, родниот град на загинатиот генерал, се облечени во црно и носат постери со неговиот лик. Иранската државна телевизија подоцна јави дека дошло до стампедо во погребната поворка, а според некои информации има над 30 загинати. Инаку, погребната церемонија почна пред три дена во Техеран каде што исто така се собраа илјадници луѓе, а продолжи денеска во градот во кој живееше Солејмани.