51 годишниот Киријакос Мицотакис го презеде кормилото на Нова демократија во почетокот на 2016 година.
Вашиот пребарувач не подржува HTML5
Мицотакис: ќе го вратам оптимизмот во Грција
Тој ја фокусираше својата кампања врз ветувањата за олеснување на грчките болки преку намалување на даноците, деблокирање на приватизациите, зголемување на инвестициите и ефикасност на државата.
Неговата партија, како што е познато, се спротивстави на договорот за името на Македонија, но Мицотакис рече дека ќе го почитува Преспанскиот договор. Сепак, тој изјави дека го задржува правото да го блокира процесот на македонското пристапување во Европската унија ако оцени дека не биле исполнети националните интереси.
Тој има дипломирано на Харвард и бил аналитичар на инвестициска Чејс банка.
Мицотакис беше министер за реформа на администрација во конзервативната влада во 2013 година кога доверителите бараа намалување на јавниот сервис.
Тој вели дека Грција би можела да биде следната „пријатна успешна приказна“ во еврозоната по неколкугодишните економски превирања.
„Ги поставив моите амбиции многу високо. Мислам дека сме подготвени за, знаете, голем чекор напред и мислам дека Грција во текот на следните четири години би можела да биде пријатна успешна приказна за еврозоната“.
Мицотакис, како што вели, сака да вдахне нов живот во економијата и да го исфрли имиџот на земјата како проблематично дете на Европа.
Неговиот главен приоритет како нов премиер е создавање повеќе работни места во земјата.
„Сакам земја што најпрвин ќе биде многу оптимистичка во врска со нејзината светла иднина“.
Тој сака да стави крај на меѓународните механизми за мониторинг, Грција да почне да зема кредити со истата стапка како и другите земји, како и да побара повеќе пари од ЕУ за справување со приливот на бегалци од Турција.
Мицотакис доаѓа од моќно политичко семејство чии корени датираат од еден од најпознатите политичари во грчката историја Елефтериос Венизелос.
Тој е син на поранешниот премиер, починатиот Константин Мицотакис.
Неговата сестра Дора е исто така политичарка и беше омажена со Павлос Бакојани, кој беше убиен од милитантната група „17 ноември“ во 1989 година.
Киријакос Мицотакис е оженет и има три деца.