Папата Францис служеше миса на Бадник во црквата Свети Петар во Ватикан со што ја отвори неделата на богослужби.
За време на неговата проповед Францис се пожали дека многу луѓе го наоѓаат своето животно значење во имотот додека библиската приказна за Христовото раѓање нагласува дека Бог им се појавил на луѓето кои биле сиромашни, но верни.
„Незаситната алчност ја обележува целата човечка историја, дури и денес, кога парадоксално неколкумина раскошно вечераат, додека повеќето секојдневно немаат леб што е потребен за преживување“, рече папата Францис, додавајќи:
„Човештвото стана алчно и незаситно. Во нашево време, за многу луѓе, смислата на животот се наоѓа во поседување вишок материјални предмети“.
Францис за време на неговото петгодишно владеење со Римокатоличката црква се фокусира врз сиромашните и угнетените во светот, бегалците и маргинализираните.
82 годишниот Францис кој е прв папа на Католичката црква од Латинска Америка му наложи на Ватикан подобро да се грижи за бездомниците во Рим, отворајќи берберница, туш и медицинска клиника за нив во близина на колонадата на плоштадот Свети Петар.
Додека папата ги предводи Божиќните церемонии во Ватикан, државниот секретар кардинал Пијетро Паролин е во Ирак да го прослави Божиќ со тамошните католички верници.
Католиците се меѓу верските малцинства кои најмногу настрадаа од исламистичките групи, како Исламската република, поради што десетици илјади мораа да ги напуштат нивните домови.