Поранешниот премиер Никола Груевски со автомобил во сопственост на амбасадата на Унгарија ја напуштил Албанија преку преминот „Хан Хоти-Муриќан“, на албанско-црногорската граница, соопшти денеска секторот за граница и миграција на албанската државна полиција, потврдувајќи официјално дека осудениот Груевски во Унгарија заминал преку Албанија.
„Одговарајќи на големиот интерес на медиумите за влез и излез од територијата на Република Албанијана на лицето Никола Груевски, информираме дека истиот на 11 ноември 2018 година во 19:11 часот излегол од Албанија преку преминот Хан Хоти во правец на Црна Гора, како патник во автомобил со регистарски ознаки CD1013A,сопственост на амбасадата на Унгарија во Тирана“, соопшти албанската полиција.
Во соопштението исто така, се наведува дека на денот кога Груевски бил на територијата на Албанија не постоела потерница од Македонија или Интерпол.
„На 11 ноември 2018 година за лицето Никола Груевски не постоеше никаква информација на нашите премини или потерница дека се бара. Интепрол Скопје на 13 ноември во 19:35 часот испрати информација до Интерпол Тирана дека лицето Никола Груевски се бара со меѓународна потерница,- се наведува во соопштението.
Во соопштението сепак не се наведува преку кој граничен премин Груевски влегол на албанска територија.
Медиумите претходно јавија дека од прегледот на TIMS системот на премините, произлегло дека тој на албанска територија не влегол преку официјален премин, што ја остава отворена можноста дека тоа да го направил илегално преку зелениот појас, по што бил во унгарската амбасада во Тирана, каде и побарал азил.