Главната расправа за предметот на Специјалното јавно обвинителство „Таргет-Тврдина“ е закажана за 22 декември, соопшти Основниот суд Скопје 1.
СЈО вчера соопшти дека еден обвинет во овој случај бил правосилно осуден на условна казна од шест месеци затвор , откако признал вина. Постапката против овој обвинет, чиј идентитет не се соопштува била раздвоена, па пресудата била донесена на 17 ноември.
Во споениот предмет „Таргет - Тврдина“ обвинети се поранешниот началник на Петтата управа во МВР Горан Грујевски и вработениот во УБК Никола Бошкоски, кои се во притвор во Грција, како и поранешната министерка за внатрешни работи Гордана Јанкулоска, поранешниот директор на УБК Сашо Мијалков и шефот на кабинетот на Мијалков, Тони Јакимовски.
Специјалната јавна обвинителка Катица Јанева очекува најстроги казни за Мијалков и Грујевски.
Од скопскиот Кривичен суд информираат дека за „Таргет-Тврдина“ рочиште е закажано и за 17 јануари 2018 година.