Претседателот на Парламентот, Талат Џафери денеска изјави дека еден од основните проблеми на парламентаризам во Македонија и воопшто функционирањето на Собранието е односот помеѓу парламентарното мнозинство и опозицијата. Тој говорејќи на отворањето на конференцијата „Вклучени граѓани за одговорно и транспарентно Собрание“ во организација на Граѓанската асоцијација МОСТ, истакна дека мнозинството на Парламентот секогаш на опозицијата гледало како на политички противник кој треба да се победи, а на моменти и политички да се елиминира.
Опозицијата, според него, треба да има активна улога во сите процеси што се одвиваат во Парламентот, но и да биде свесна дека мнозинството треба да ја спроведе и реализира зацртаната програма бидејќи врз основа на неа народот му ја дал довербата. Но, како што истакна, недостасува политичка волја и политичка култура за тоа да се спроведува.
Тој ги осуди неодамнешните настани во Парлaментот и ги повика институциите да ги најдат виновниците. Според Џафери, враќањето во една нормална општествена состојба, по неколугодишната криза во земјата, подразбира почитување на принципите на парламентарната демократија, владеењето на правото и почитување на човековите права и слободи и нема да се случи преку ноќ.