Граѓанската иницијатива „За заедничка Македонија“ денеска на прес-конференција ги оцени како клучни претстојните денови и најави интензивирање на протестните маршеви. Како што истакнаа, нивните протестни активности ќе продолжат во иста форма и ќе бидат мирни.
Борис Дамовски, кој е еден од организаторите на протестните маршеви, рече дека бројноста и решителноста на граѓаните е оружјето со кое се борат на улиците.
“Основна задача на секој граѓанин на Република Македонија е да присуствува на овие протести. Единствениот функционален дел од оваа држава во моментов се граѓаните кои знаат како беа излажани. Овие денови се клучни со интензивирање на протестите. Ќе продолжат во истата форма, мирни, ненасилни, без кршење, навредување, викање, туку самата бројност и решителност на граѓаните е оружјето со кое се бориме на улиците”, рече Дамовски.
Тој апелираше граѓаните да излезат во што поголем број, да зборуваат со што повеќе пријатели, роднини и да ги уверат дека, како што потенцира, тоа е единствениот начин за Македонија да излезе од оваа институционална криза.