Генералниот секретар на ОБСЕ Ламберто Заниер на својот официјален твитер профил напиша дека неговата главна порака до министерот за надворешни работи Никола Попоски и до претседателот Ѓорге Иванов е дека кризата мора да се реши за доброто на граѓаните и дека не смее да се дозволи прелевање на проблемите во меѓуетнички тензии.
„Утрово се сретнав со претседателот и со министерот за надворешни работи. Мојата главна порака беше дека лидерите мора да се исправат пред предизвикот, да ги надминат партиските интереси и да ја решат политичката криза за доброто на сите граѓани. Не смее да се дозволи ова да се прелее во меѓуетнички тензии!, “ напиша Заниер.
Тој по завршување на денешната посета во Македонија, забележа дека резултатите од декемвриските избори во 2016 година овозможија солидна основа за формирање влада и го повика Собранието да започне со работа, согласно демократските принципи и владеењето на правото.
„Надминувањето на политичката пат-позиција и враќањето на политичката стабилност мора да бидат највисок приоритет. Клучот за решението лежи во рацете на политичките актери кои треба да се справат со предизвикот и да ја решат кризата за доброто на сите граѓани, вели Заниер.
Тој претходно напиша дека на претседателот Иванов му ја нагласил својата „загриженост за политичкиот ќор-сокак“ и дека „вперувањето со прст во меѓуетничките прашања е опасно и контрапродуктивно“.
Заниер кој е во дводневна посета на земјава, се сретна со претседателот Иванов, шефот на македонската дипломатија, Никола Попоски, како и со лидерите на парламентарните политички партиии. Тој стакна дека е загрижен и од притисокот врз граѓанскиот сектор, чија улога како што вели е „клучна во демократските процеси“.