Иако во поставениот шатор пред Владата во Тирана, опозицијата нема многу комодитет за да остане тука подолго, таа е решена да не се повлекува се до исполнување на барањата: заминување на премиерот Еди Рама и формирање техничка влада, како услов за спроведување слободни и фер избори- порача синоќа лидерот на демократите Љуљзим Баша. Упативме силна порака до светот: Албанците веќе нема да прифатат демократија-фасада, туку единствено вистинска демократија, само слободни и фер избори, рече тој.
Баша од завчера е во шаторот заедно со над илјада членови на опозицијата, меѓу кои и пратеници, како и поранешниот партиски лидер и екс премиер и шеф на албанската држава, Сали Бериша. Во пресрет на 20-ти февруари, кога во 1991 година во центарот на Тирана беше урнат споменикот на комунистичкиот диктатор Енвер Хоџа, демократскиот лидер ги повика Албанците да се приклучат кон протестите.