Официјален Берлин смета дека мандатот за формирање влада треба да и се даде на втората по големина партија во Македонија, му рекла германската амбасадорка Кристине Алтхаузер на претседателот на ВМРО-ДПМНЕ, Никола Груевски. Во партиското соопштение по нивната денешна средба се наведува дека Груевски ја прашал дали тоа е нејзина сугестија, на што таа одговорила дека „тоа е онака како што во моментот се гледа во Берлин“.
Груевски на средбата повторил дека „ситуацијата е зрела за брзи избори“ и оти Уставот не предвидува дека ако победникот не успее да формира влада, мандатот и се дава на втората партија, но оти конечната одлука е работа на претседателот.
Во партиското соопштение по средбата се наведува дека Груевски рекол дека ВМРО-ДПМНЕ ја очекува одлуката на претседателот Иванов, по што партијата „ќе се прилагоди на таквата одлука“.
Груевски денеска се сретна и со рускиот амбасадор Олег Шчербак, со кого разговарале за „актуелната политичка ситуација во Македонија и во Русија“.
Во партиското соопштение по средбата се наведува дека рускиот амбасадор се осврнал на Шарената револуција, „истакнувајќи ја штетата која истата ја предизвика на економски план внесувајќи нестабилност и неизвесност во државата, а со тоа и влијаејќи негативно на интересот на заинтересираните инвеститори“.
Тој „потенцираше дека секаде каде се организирани обоени револуции страда социо-економската благосостојба на граѓаните“, стои во соопштението.