Претседателот Ѓорге Иванов е на средба со претседателот на ДУИ, Али Ахмети, откако претходно денеска имаше одвоени средби со раководствата на Беса и на Алијансата за Албанците, како дел од консултациите со политичките партии за актуелната политичката состојба во Македонија и формирањето нова влада.
Лидерите на Беса и на Алијансата за Албанците, Билал Касами и Зијадин Села, по разговорите со Иванов не дадоа изјави за медиумите. Во претседателската вила „Водно“ попладнево шефот на државата треба да има средби и со лидерите на СДСМ и на ВМРО-ДПМНЕ, Зоран Заев и Никола Груевски.
На консултации со претседателот Иванов, како што информираат од неговиот кабинет, биле поканети и претставници на ДПА.
Консултациите со политичките партии кои се застапени во Собранието на Република Македонија, се на иницијатива на претседателот Иванов, а следуваат по неговите средби со претседателот на Уставниот суд Никола Ивановски и со амбасадорот на ЕУ во Македонија, Самуел Жбогар.
Иванов на вчерашната средба со претседателот на Уставниот суд истакнал дека досега постапувал исклучиво во рамки на своите права, должности и надлежности, почитувајќи го Уставот. Претседателот посочил дека и во однос на актуелната ситуација ќе постапува во согласност со уставните одредби и исклучиво во интерес на државата и на граѓаните на Република Македонија.