Заев го бара мандатот за формирање влада

Претседателот на СДСМ, Зоран Заев

Лидерот на СДСМ Зоран Заев побара од претседателот Ѓорге Иванов да му го додели мандатот за формирање влада. На денешната прес-конференција во партиското седиште, Заев рече дека секоја друга опција ќе значи кршење на уставот и злоупотреба на функција.

„Никола Груевски никогаш повеќе нема да биде премиер. Сè докажа дека Груевски го нема потребното мнозинство. ВМРО-ДПМНЕ синоќа на полноќ ја изгуби можноста да формира влада. Демократските процеси се почнати, така одлучија над 612 илјади граѓани на изборите. Очекувам Иванов да ми го додели мандатот за формирање влада, сите поинакви опции ќе значат кршење на уставот и злоупотреба на функцијата“, кажа Заев пред малку на прес-конференција во седиштето на СДСМ.

Од Кабинетот на претседателот Иванов претходно соопштија дека чекаат официјално известување од Собранието дали има предлог за нова влада за да ги почне консултациите со политичките партии.