Специјалното јавно обвинителство се откажува од обвинителниот акт за предметот познат во јавноста како Пуч. Во соопштението што го објави СЈО е наведено дека причина за тоа е што фактичката состојба во тој предмет е во спротивност со доказите и наодите во истражните постапки „Таргет“ и „Тврдина“. Од СЈО велат дека денеска до Основниот суд Скопје 1 ќе достават поднесок со кој формално ќе се откажат од предметот.
„Ваквата наша одлука е со цел да се приберат дополнителни докази што во целост ќе ја разјаснат фактичката состојба и ќе овозможат донесување на правилна и законита јавнообвинителска одлука,“ се вели во соопштението.
Од СЈО појаснуваат дека не можат да застапуваат обвинителен акт кој е во спротивност со доказите со кои располагаат и истрагите кои ги отвориле.
„Воедно укажуваме дека со откажување од обвинителниот акт во предметот „Пуч“ ние не прејудицираме дали некој е невин или виновен, туку сметаме дека за целосно и точно утврдување на фактичката состојба, потребни се дополнителни докази, кои не можат да бидат прибавувани во фазата на главна расправа, “ е наведено во соопштението.
Во предметот Пуч првообвинет е поранешниот шеф на разузнавање Зоран Верушевски, потоа неговата сопруга Соња Верушвска, вработен во општината Струмица Бранко Палифров и лидерот на СДСМ Зоран Заев.
Тие се товарат за неовластено прислушување, шпионажа и насилство спрема претставници на највисоките државни органи. Еден од обвинетите Звонко Костовски, се спогоди со Обвинителството и беше осуден на казна затвор во траење од 3 години.
Судскиот предмет досега помина низ низа одложување на рочиштата без при тоа да започне расправа за предметот.