Во Британија се одржуваат парламентарни избори, на кои, според очекувањата, би требало да победи Лабуристичката партија на премиерот Тони Блер. Тоа ќе биде негов трет последователен мандат, што е своевидна историја во Британија. Имено, никогаш досега некој лабуристички лидер не бил три пати едно по друго на функцијата премиер. Резултатите на јавното мислење покажуваат дека опозиционите конзервативци и либерал демократи немаат шанса да освојат мнозинство во Долниот дом на парламентот. Повеќе од четириесет и четири милиони британци со прво на глас ќе можат да се изјаснуваат на избирачките места кои се затвораат во дваесет и три часот по средноевропско време.
