Кога Доналд Трамп беше избран за претседател на САД во 2016 година, рускиот пратеник Владимир Жириновски беше домаќин на забава со шампањ во рускиот парламент за да ја прослави изненадувачката победа на магнатот за недвижнини.
„Кон нова внатрешна и надворешна политика на САД! И до брзо подобрување на односите меѓу САД и Русија“, изјави тогаш Жириновски, националист и долгогодишен сојузник на претседателот Владимир Путин.
Велешките сајтови повторно актуелни пред изборите во САД
Четири години по таа церемонија, Жириновски вели дека ја изгубил вербата во Трамп кој зборуваше за нова ера на соработка со Путин и Русија. „Трамп не направи ништо добро за Русија“, рече Жириновски за РСЕ, сепак, додавајќи: „Трамп ќе победи на 3 ноември. Сигурни сме во тоа“.
Конфликтниот став на Жириновски, според аналитичарите стана особено распространет во Русија од 2016 година.
На прашањето дали Трамп или поранешниот потпретседател Џо Бајден ќе биде подобар за Русија, скоро две третини од испитаниците во неодамнешната анкета на независниот центар Левада изјавија дека тоа не е важно.
Друго истражување објавено во септември покажа дека 23 проценти од Русите гледаат на Трамп позитивно, а 43 насто негативно. Повеќе од половина од анкетираните никогаш не чуле за Бајден.
Русија виси скоро половина деценија како сениште над американската политика, вметнувајќи дебати за доаѓањето на Трамп на претседателската функција и континуирано ги отфрла обвинувањата дека е вмешана.
За возврат, Трамп ги отфрла тврдењата за улогата на Москва во неговиот избор како „лов на вештерки“, иако неколку поранешни соработници се обвинети за таа работа.
„Зошто треба да се грижат Русите?“
Пандемијата на коронавирус силно ја погоди Русија и реалните плати паднаа веќе шеста година по ред. Со оглед на ваквите домашни маки, политичкиот ќор-сокак преку Атлантикот не привлекува внимание како некогаш.
„Зошто Русите треба да се грижат? вели Фјодор Лукјанов, руски аналитичар за надворешна политика, кој е и советник на Кремљ. „Соединетите држави се сосема друга земја. Не верувам дека некој очекува каква било промена, без оглед на тоа кој ќе победи“.
Огромните разлики меѓу Трамп и Бајден
Тука можеби лежи и суштината. Во 2016 година, Жириновски беше далеку од сам во навивањето за Трамп.
Многумина во Русија сметаа дека неговата кандидатура е вистинска шанса за подобрување на односите со Соединетите држави и укинување на западните санкции што ја попречуваат руската економија од анексијата на украинскиот полуостров Крим во 2014 година.
По изборите во САД 2016 година, Трамп го опиша Путин како „вистински лидер“ и вети дека ќе ги нормализира врските со Русија.
Во замена, руските државни ТВ-канали беа полни со пофалби за Трамп, истовремено критикувајќи ја Хилари Клинтон.
„Трамп го хакираше расипаниот американски систем на елити, играше според неговите правила и стана претседател“, изјави пропагандистот на Кремљ Дмитриј Кисељов по изборите во 2016 година.
На неколку месеци пред изборите во 2016 година, три последователни анкети на Центарот „Левада“ покажаа растечки процент на Руси кои навиваат за Трамп, а не за Клинтон, траекторија што се совпадна со координираната државна ТВ кампања за да се наслика Трамп како спасител на Русија.
Овој пат, вели директорот на Левада, Лев Гудков, релативниот недостаток на интерес за претстојните избори во САД произлегува од неговото помалку истакнато место во покривањето на државната телевизија.
Според Гудков, само две групи ги следат изборите: официјални лица од Кремљ и пензионери кои гледаат државна телевизија. Меѓу младите во Русија, само околу 5 или 6 проценти обрнуваат внимание, пет пати помалку отколку кај генерацијата на нивните баби и дедовци.
„Во позадината на меѓународната изолација на Русија и очигледната криза во односите со европските земји и САД, ТВ-пропагандата се обидува да ги затвори сите информации што може да содржат критики за Русија“, вели Гудков за РСЕ.
Тој забележува дека изборите во САД се втор или трет најчесто покриен настан во вестите на руската телевизија, а меѓу анкетираните испитаници кои изјавиле дека го следат изборот, трипати повеќе навиваат за Трамп отколку за Бајден, кој е далеку помалку познат од актуелниот претседател.
Позната личност
Но, за Кремљ, кој се чини дека не ја дели апатијата на руските граѓани, Бајден е позната личност. За време на неговиот мандат како потпретседател на Барак Обама, Бајден тврди дека учествувал во особено остра размена со Путин при посетата на Кремљ во 2011 година.
„Гледам во твоите очи и мислам дека немаш душа“, се присетува Бајден во интервју за „Њујоркер“ за тоа што му кажал на Путин на таа средба. „Тој погледна назад кон мене, се насмевна и ми рече:„ Се разбираме едни со други “.
Лукјанов вели дека персоналот во Кремљ „не е толку длабок стратег“, но меѓу официјалните лица и аналитичарите во Русија, „постои повеќе или помалку консензусен став дека, дури и да победи Бајден, нема да има враќање на статус кво ситуацијата.
Америка веќе ја пренасочи својата парадигма кон помал експанзионизам и повнимателна политика“. Откако Трамп ветуваше подобри односи со Русија во 2016 година, многу Руси се разочарани кога видоа дека овие планови се уништени.
Русија ги одби САД за замрзнување на договорот за нуклеарно оружје
Неговите сопствени служби за разузнавање заклучија дека Москва се мешала во изборите во 2016 година и сега велат дека тоа го прави повторно. Во Конгресот има двопартиска поддршка за построги санкции против Русија.
Замор од Трамп
Последниот значаен договор за контрола на оружјето меѓу двете земји треба да истече во февруари, а преговорите за продолжување или обновување не се на повидок. Сето ова влијаеше врз угледот на Трамп во Русија.
„Се појавија многу надежи“ во 2016 година, вели Иван Курила, историчар за руско-американските односи на Европскиот универзитет во Санкт Петербург за РСЕ, додавајќи:
„Овој пат, не очекувам изборите во САД да влијаат врз Русија на кој било начин, бидејќи не очекувам американската политика кон Русија значително да се промени“.
На крајот, вели рускиот политички аналитичар Татјана Становаја, тоа може да се сведе на „замор од Трамп“.
„Победата на Трамп во 2016 година беше прекрасно изненадување за Кремљ. Неговата реторика кон Русија беше сосема поинаква од онаа на неговите претходници: без критики, без проповедање, без промовирање на либералните вредности“, напиша Становаја во неодамнешната колумна, заклучувајќи:
„Сега, чувството во Москва е дека ако Трамп не може да ја извлече Русија од спиралата на конфронтација со САД, тогаш никој друг не може да го стори тоа“.
