Американските медиуми јавуваат дека администрацијата на претседателот Џо Бајден ги укинала ограничувањата што ја спречуваа Украина да користи оружје обезбедено од Америка за да нападне длабоко во руската територија.
Денешните (17 ноември) извештаи на Њујорк Тајмс, АП и Ројтерс цитираа извори запознаени со ова прашање.
Белата куќа не ги коментираше извештаите и не одговори веднаш на барањата за коментар од РСЕ. Советот за национална безбедност (НСЦ) исто така одби да коментира.
Доколку се потврди, тоа би претставувало голема промена во политиката на САД во услови на долгогодишни молби од Киев да дозволи такви акции.
Украинскиот претседател Володимир Зеленски не ги потврди директно извештаите, но рече дека една од главните точки на неговиот „план за победа“ претставен на сојузниците вклучува употреба на оружје со долг дострел од страна на неговата војска.
„Денеска, многу луѓе во медиумите велат дека добивме дозвола за соодветни акции. Но, [воjниците] не напаѓаат со зборови. Вакви работи не се најавуваат. Ракетите ќе зборуваат сами за себе“, рече тој на Телеграм.
Ројтерс, повикувајќи се на свои извори, објави дека Киев планира да го изврши првиот од таквите напади со долг дострел во следните неколку дена, но не откри детали.
Украина најверојатно би ги искористила ракетите ATACMS, кои имаат дострел до 300 километри, објави Ројтерс, цитирајќи три извори запознаени со проблемот.
Администрацијата на САД бара начини да ја зајакне поддршката за Украина пред заминувањето на Бајден од Белата куќа на 20 јануари, кога новоизбраниот претседател Доналд Трамп ќе се врати во Белата куќа.
Трамп ја критикуваше силната поддршка што Бајден му ја даде на Киев и рече дека бара крај на војната што е можно побрзо, но со услови кои најверојатно би биле неприфатливи за Украина.
Немаше веднаш коментар од транзицискиот тим на Трамп, но клучниот советник го искритикува потегот во објава на платформата X.
„Ескалација на војните пред да ја напушти функцијата“, напиша Ричард Гренел.
Од друга страна, Бен Хоџис, пензиониран американски генерал-полковник и поранешен командант на американските воени сили во Европа, за РСЕ изјави дека таквиот потег ќе испрати „порака до Кремљ дека (САД) не се откажуваат и го чекаат Трамп“.
Хоџис рече дека тоа би било „добра работа бидејќи таа политика ќе биде во сила додека администрацијата на Трамп не ја преземе власта и, искрено, тоа е добра работа за Доналд Трамп“.
Тој рече дека приоритет на Украина при употребата на такво оружје најверојатно ќе биде рускиот регион Курск, користејќи го за напади на командни пунктови, складишта за оружје и артилериски батерии.
Следниот приоритет веројатно би бил таргетирање на аеродромите што Русија ги користи за напади врз украинските градови.
Филипс О'Брајан, професор по стратешки студии на Универзитетот Сент Ендрјус во Шкотска, рече дека верува оти овој потег е одамна задоцнет и дека сега постои загриженост дали Трамп ќе го повлече потегот кога ќе ја преземе функцијата.
Тој и други набљудувачи рекоа дека потегот на САД најверојатно ќе ги поттикне другите сојузници, вклучувајќи ги Велика Британија и Франција, да направат слични потези.
Употребата на Украина на оружје со долг дострел испорачувано од Запад ги подели сојузниците на Киев, дел од нив стравуваат дека тоа би можело да предизвика руски контра-одговори и да доведе до поширока европска војна.
Претходно Бајден не сакаше да дозволи такви акции, иако Белата куќа во мај даде дозвола за употреба на ATACMS за ограничени напади близу руската граница за да се одвратат непосредните напади против Украина.
АП и други медиуми цитираат извори кои велат дека најновата одлука на Бајден е веројатно одговор на тоа што Северна Кореја испратила илјадници војници во Русија поради извештаите дека некои веќе се вклучиле во борби во рускиот регион Курск.
Кремљ предупреди дека дозволувањето на САД или другите западни сојузници да користат оружје со долг дострел насочено кон Русија ќе се смета за голема ескалација.
Од нејзината целосна инвазија во февруари 2022 година, Русија го користи своето оружје со долг дострел и воени авиони за да нападне длабоко во Украина, погодувајќи цивилни и инфраструктурни локации заедно со воени цели.
Надлежните за украинската енергетска инфраструктура денеска (17 ноември) соопштија дека сите украински региони ќе имаат привремени ограничувања на потрошувачката на електрична енергија на 18 ноември, откако Русија го изврши еден од најголемите воздушни напади врз енергетската инфраструктура на земјата.
Руските напади ги осудија Европската унија, НАТО и другите западни сојузници.
„НАТО силно го осудува рускиот напад од големи размери против Украина кој уби и тероризираше цивили и чија цел беше критичната енергетска инфраструктура“, рече портпаролката.
„Ние стоиме покрај Украина и сојузниците продолжуваат да даваат невиден придонес во одбраната на Украина“, додаде таа.
