Македонските граѓани се мобилизираат за да им помогнат на настраданите во пожарите во источна Македонија, со донации на хуманитарен пункт кој беше отворен денеска (5.8). Во седиштето на Конфедерација на Синдикалните организации на Македонија се донира облека, средства за одржување и хигиена, обувки, душеци, постелнина...
Акцијата здружено ја водат „Хуманитарни акции.мк“, Конфедерација на Синдикалните организации на Македонија (КСОМ) и Интернационална Полициска Организација (ИПО).
„Сакаме да помогнеме на цела Источна Македонија, но прво во Свети Николе, бидејќи во овој момент таму се најзагрозени. Има и изгорени куќи, секако дека на тие луѓе треба да им се помогне“, вели Лазо Костовски, претседател на независен синдикат на Геријатрија.
Планот е донациите да се однесат во триесетина села и да помогнат на околу 400 домаќинства. Во моментов, има потешкотии со превозот. Користат сопствени возила за да се снајдат, но потребен е поголем капацитет.
„Се јавуваат граѓани кои сакаат да донираат мебел, а не можат да го донесат во пунктот. Па се трудиме да се организираме некако“, вели Ејуп Акија, претседател на Меѓународна полициска организација ИПО.
Во контакт се со градоначалникот на Свети Николе и велат дека на граѓаните таму најмногу им треба облека, обувки, кревети, душеци. Но, и репроматеријали како цемент, греди, табли и општо градежен материјал за да ги изградат нивните изгорени домови.
„Прво треба да обезбедиме возило за да се транспортира донираното. Веќе сме во преговори со Црвен Крст на Град Скопје и ако има слободен камион ќе ни излезат во пресрет. Во план е поставување на пунктови и пред големите маркети низ општините“, додаде Костовски.
Освен во Скопје, се донира и во други градови. Дел од помошта собрана во Велес уште утрово тргна кон Свети Николе.
„Навистина сме задоволни од одзивот на граѓаните. Не очекувавме дека за толку кратко време ќе собереме толку многу донации“, истакна претседателот на независен синдикат на Геријатрија.
Во „хуманитарни акции.мк“ им најавиле донации од целата држава и од дијаспората. Па потребно ќе биде вклучување на повеќе луѓе за да се сортираат донациите и да бидат соодветно транспортирани.
„Изминативе две седмици ние веќе праќаме донации, но сега се окрупнуваме со главен хуманитарен пункт. Веќе имаме душеци, перници, пелени, облека, лекови. Секоја помош ни е моментално потребна, затоа што сме во период кога да речеме половина од населението е на одмор“, изјави Владимир Чолаковски од хуманитарната организација.
Тие веќе имаат облека, храна, лекови во залиха бидејќи работат на ова поле 25 години. Се координираат преку форум групи на социјалните мрежи.
За КСОМ и ИПО ова е прво искуство со здружување сили за хуманитарна акција. Велат, ќе го прават ова додека има потреба, но опција е да стане и традиција. Односно, да им помагаат на други социјално загрозени граѓани откако ќе помине овој период кога треба да им се помогне на загрозените од пожарите.
